Hallo - alle Männer mal herhören, bzw. lesen!!!!!
Ganz wichtig für die noch anstehenden Weihnachtseinkäufe, weiß ja, daß Ihr Männer die Geschenke erst immer im aller-allerletzten Moment besorgt.


Weihnachtsgespräch an der Theke


Sepp: Omei, Karre, is dees a Kreiz!

Karre: Oba ehrlich!

Sepp: In 6 Tog is scho wieda Weihnachten!

Karre: Des wann scho wieda rum waar!

Sepp: Des konnst laut sogn! Alle Joahr es gleiche G'fetz! Do kaffst de Kinder drümmer Gschenka und dann? Dann mochas a Gsicht!

Karre: Genau! Bei mir dahoam is grod aso. Die san mit nix z'friedn. Normal sollt ma eahna gor nix schenka, dann kanntns a Gsicht mocha!

Sepp: Ganz mei Meinung! Dann hättns wenigstens an Grund dafür. Oba de machn a so und a so a Gsicht! Ohne Grund mochn de a Gsicht!

Karre: I wenns scho seh, dan glangts mir scho! Wia kon ma bloß a so a Gsicht mocha? I Depp kaff fürn Buam letzts Joahr a Radl mit 21 Gäng und denk ma: "Do werd er schaun!"

Sepp: 21 Gäng? Ja mi leckst fett! Do werd er gschaut hom!!!

Karre: Von wegen! A Gsicht hod er gmacht, weils a silberns Radl wor und er wollt a blaus. Soweit samma heit! Als ob de Farb a Rolln spieln daad? Woaßt, wos i gsagt hob? I hob gsagt: "Bürscherl, wenn des Gsicht a Dank is für des Radl, dann konnst Dir nexts Joahr aaf Weihnachten a Gschenk schnitzn! Dann kaff i Dir nix mehr, daß des woaßt! I nimmer!!!"

Sepp: Und? Wos hod er gsagt?

Karre: Grod no so, daß eahm a "Danke, Papa" auskemma is, aber bloß wegn seim schlechtn Gwissn. Oba des wor net ehrlich, des hob i kennt an seim Gsicht!

Sepp: Mi wundert nix mehr! De Kinda san heitzutog völlig verzogn!

Karre: Des kummt vom Fernsehn! Do segns ja den ganzn Tog nis anders. Vorigs Mol hams bei da Tokschou (Talkshow) vo dera Wamperten des Thema ghabt: "Mein Vater ist eine Null". Jo, isn des a Thema? Wo soll denn des no hiführn?

Sepp: Des sollt se mei Herr Sohn amol erlaubn und sagn, daß i a Null bin!
Stell dir des amol vor: Du schaust Fernseh und dann siegst dei eigens Fleisch und Blut und des sagt: "Mein Vater ist eine Null!" Do wars aus bei mir, des kann i Dir sagn!

Karre: Dem daad i es Taschngeld radikal kürzn!

Sepp: Und an Weihnachten kannt er si von mir aus auf sei Maul naufschlagn.
I daad eahm nix mehr kaffa! Oba Karre, unter uns gsagt: "Mei Weib is net viel anders! A dodal undankbar!"

Karre: A geh, wos du net sagst?

Sepp: Wenn i dir doch sag! Vor 3 Joahrn schenk i ihra aaf Weihnachtn a Dampfbügleisen. A Supergerät! Und des hod ihr fei net paßt! Jetzat kimmst Du!

Karre: Jo, gibts des aa! Wos hot ihr denn dann ned passt?

Sepp: Koa Ahnung! Sie hot ja nix gsagt, bloß a Gsicht hods gmacht. Und zwar a so a Gsicht, do wo du als leidgeprüfter Mann genau woaßt: Dera paßt wieda wos ned!

Karre: Woaßt wos? Es gibt koa Dankbarkeit nemma!

Sepp: Du sagst es! Und vor 2 Joahr hob i ihra sogar a Microwelle kafft! Aber, sie hod wieda a Gsicht gmocht! Andere dadn sie gfrein, oba mei Madam macht a Gsicht!

Karre: Ja, was soll ma denn no alles kaffa, daß de Weiber amol zfriedn san?

Sepp: Des hob i mi a gfragt. Und drum hob i mir letzts Joahr an Weihnachtn denkt: "Jetzat is mit wurscht, was des kost, jetzat kaffst ihra a Nähmaschin!"

Karre: Oläck!!! So großzügig is net glei oana wie du, mei Liaba!

Sepp: Ja, du erkennst des, oba sie ned! Sie packt die Nähmaschin aus und i denk mir, jetztat werds glei an Juchzerer tun und mir um den Hols falln und was passiert? - Sie mocht scho wieda a Gsicht! Do konnst doch nemma oder?
A Nähmaschin um 399 Euro und sie mocht a Gsicht! Woaßt, do denkst dir dann scho: "Spinn i jetzt oder wos?"

Karre: Des is ja unvorstellbar! Ja, wos hot ihr denn do wieda net paßt?

Sepp: Des wollt i a wissn! Drum hob i sie gfragt, was des soll. "Angelika",
hob i gsagt, "was soll des? I kaff dir a Dampfbügleisen, du mochst a Gsicht.
I kaff dir a Microwelle, du machst a Gsicht. I kaff dir a Nähmaschin mit
6 Joahr Garantie und du machst scho wieda a Gsicht! Ja, herrschaftnoamol, was soll i dir denn aaf Weihnachtn schenka, daß du koa Gsicht net machst?"
Woaßt, do bin a dann glei radikal, des will i dann scho wissn!

Karre: Ja und? Was hods nacha gsagt?

Sepp: Sie hod gsagt, "Weihnachten ist ein Fest der Herzen und koa Haushaltswarenausstellung ned".

Karre: A so a Schmarrn!

Sepp: Jo mei, Weiber san halt a so verdraat! Aaf jeden Fall hat sie gsagt, sie möcht net dauernd wos fürn Haushalt, sondern wos fürs Herz. Und drum hob i ihr heier wos fürs Herz kafft.

Karre: Wos hastn ihra nacha kafft?

Sepp: A wundaschöns und guats Blutdruckmeßgerät!!!




Also, liebe Männer, denkt dran, wir Frauen wollen entweder "wos glänzerts fürn Hals oder wos fürs Herz"!!!!!

Aber keinen silbernen Schal und kein Blutdruckmessgerät!!!!


Liebe Grüße und laßt Euch gut beraten beim Einkaufen der Weihnachtsgeschenke, net, daß'd Frau aa a Gsicht macht!!!!

Leni